【潮文】窮人神器 沒有電車我點求婚？

前政府規劃師薛國強早前向城規會建議取消中環至金鐘段電車，平日搭電車慳錢排隊儲首期的阿潮今次慘慘豬啦，其實搭電車還有以下理由要保留，除了懷舊：

1. 電車其實不慢

薛兄說自己「行路可能快過搭電車」，阿潮當堂嚇一跳，然後得啖笑。雖然阿潮未找到官方數據，但有電車意外的報道引述有司機說當時車速可能有30至40公里。阿潮保守估計，假設以每小時40公里，拉勻一生來計，即100米只需10秒。

保特在2009年的100米世界紀錄也是9.58秒，看來薛兄骨格精奇，是香港運動界的滄海遺珠，2016年巴西奧運靠你了！

沒錯，現在因為交通擠塞，電車時速只能讓賽走2至3公里，慢過行路。不過反而證明了電車也是交通擠塞的受害者，還要平靚正，打工仔怎能不選？老細，比次機會啦！

2. 2000元求婚

早前有「巴打」豪華40萬求婚，令BB豬羡慕到講足幾日，雖然高登仔把40萬元求婚套餐壓至5萬，但長期糧尾的阿潮仍然無法負擔，慶幸還有電車。

阿潮睇過電車官網，租一次電車求婚只是2000元有找，平過買部iPhone 又浪漫過遊半空，還可以跟BB豬扮Titanic 吹風吹足一小時，順道翌日射波請病假。

這麼完美的求婚計劃最需要的便是「窮人恩物」電車。

3. 失戀扮主角

失戀除了關上房門聽一百次羅生門、找知己飲Jolly Sandy扮醉酒、在電腦面前呆3粒鐘思考應否轉facebook status 外，還可以搭電車遊車河。

想起那些年，阿潮每次失戀總會搭電車，而且一定要坐在上層窗邊座位，吹到頭髮亂了，還要拿一本名不經傳的詩集添文藝氣息。

但沒有電車呢？以後可能要去輕鐵聽大媽的「R」音進行曲，或去地鐵拍攝「飲食男女」。當然，正如找不到發哥自拍也不會找發叔袋住先的道理一樣，只有電車才有失戀feel。

4. 奉旨遲到

老闆：「乜咁遲返來。」

阿潮：「我今朝一早起身出門口，本身諗住搭地鐵，不過最衰地鐵delay 。」

老闆：「咁你行返來？」

阿潮：「唔係，我九秒九上咗架電車。」

老闆：「醒目，比著我實踩單車。陣間send 個email 表揚你，forward 埋比人事部等佢地知你幾威水先。」

這時候你一定會想，如果說取消電車可增加三成德輔道中路面面積，其實有些公司的辦公室沒有「老細房」也可以增加三成面積，不過......你懂的。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。